الجمعة، 22 أغسطس 2008

غدا نقطفها


سبسطية .. معشوقتنا الجميلة
إليك نهدي كل تعبنا ، كل افكارنا ، جهدنا ، جوعنا ، ضربات الشمس ، مكانسنا ، ابتسامتنا ، لحظات التضامن، خطواتنا بين المؤسسات الثلاث ، لحظات اليأس ولحظات الأمل ، كل ما شحدناه من بعضنا : اقلام رصاص ، مساطر، كرتون، كاسات بلاستك ، خيش ..و كتف نستريح عليه
وغدا تثمر البذرة ( والي عاجبني بالموضوع انو غدا هون مو مجاز لمستقبل لا نعرفه)
مهرجان سبسطية للتراث والسياحة الثقافي
23-25 / 8 /2008
معكم في اطار التغطية :
ملاحظة1: كل المذكورين اعلاه ملعون سنسفيل سنسفيلهم بالشغل والتطوع والتحضير للمعارض ، ومن المخطط له ان يلتعن سنسفيلهم اكثر واكثر خلال الثلاث ايام القادمة ، فأعذرونا أن تأخرنا في تغطية الحدث
ومع ذلك فأننا نعلن حرب جكر مع الحدود لنوصل المهرجان لكل من لم يستطع الحضور سواء بسببها او بسبب الحواجز الغبية .. لتكونوا معنا ولنكون معكم
ملاحظة 2 : شكرا بحجم السماء لـ لاجئ الى متى على التصميم وعلى عمله معنا لأنجاح هذا المهرجان وليكون موجودا في سبسطية رغم كل شيء
و شكرا بطعم الارض لمتشرد الذي تعب معنا كثيرا خلال التحضير للمهرجان و للمنفي ايضا لسؤاله الدائم ومتابعته لمجريات المهرجان
و شكرا كبيرة جدا لأمل كعوش التي ساهمت في مجاكرة الحدود واحضار ميرون الى سبسطية لتكون معنا وتحملت كل زناختي في هذه اليومين
ملاحظة 3: تبدأ التغطية التلفزيونية في وقت ما من الساعة الخامسة والنصف الى السادسة والنصف على تلفزيون فلسطين
.
.
.
.
في اطار التغطية :
21/8 /2008 :
حملة تنظيف ضخمة يقوم بها متطوعين من سبسطية ومن باقي الوطن وحتى من خارجه في اطار التحضير لمهرجان سبسطية للتراث والسياحة الثقافي
رغم شمس الظهر اللاهبة والتعب الذي خدر الاطراف شعرنا بفرحة عظيمة للمشاركة بهذا الحدث ولرؤية عشرات الشباب يساهمون في جعل سبسطية اجمل
22/8/2008:
مؤسسات وبلدية سبسطية بالاضافة الى الجهات التقوم باخر التحضيرات استعدادا للافتتاح المترقب غدا
بلهجتنا : الدنيا عجقة الها طعم حلو ، صح ارتباك اخر اللمسات بس فرحة رؤية الانجاز ، التعاون بين الجميع في اعلى مستوياته ، والعمل يسير بوتيرة متسارعة، رحلة طويلة بدأنها ورح نكملها من بكرة ... ... ونبتسم

هناك 15 تعليقًا:

عابرة يقول...

اليوم سنقطف اول موسم من مواسمنا الغاليه
اليوم سنقطف تعبنا لنريه للعالم بأجمع

المنفي يقول...

في انتظار التفاصيل

watan يقول...

عابرة

علييييهم


خخخ لأ يسعدلي المتحمسة
يلا يعطيك العافية قطفنا والموسم منيح

اراك غدا

watan يقول...

المنفي


نوافيكم بالتفاصيل بعد ما نوخد نفس
المهم تابعتوا تغطية التلفزيون؟؟

بالمختصر المفيد او موجز الاخبار : كان ناجح وانبسطنا كثير وحققنا كثير اشياء وتعرفنا ع كثير ناس ... والحمدلله

CًٍHًٍE يقول...

إلتعن سنسفيل سنسفيلنا ...

مش ححكي اكتر ...

\\

che

watan يقول...

تشي

طب منيح الي فيك حيل تحكي هالكلمتين


اراك رفيقي الملعون سنسفيل سنسفيله ... مثلي

alzaher يقول...

تقبلوا خالص تعازيي في فقيد فلسطين والأمة محمود درويش
وخالص تمنياتي لكم بالنجاح والتوفيق في تنظيم هذا المهرجان

العبيط يقول...

اوكي اولا ، انا صار الي تقريبا شهرين ما دخلت انترنت بعد اجازتي في الوطن اللي جابتلي مصايب و الحمد لله

ثانيا ، انا العبد الفقير لله كل ما بسمع كلمة مهرجان بيصيبني شلل خصوصا كلمة ( مهرجان ثقافي) و كلمات افتتاح و وداع و مش عارف شو

الاصل في الثقافة انها تكون على اتصال مع الناس طول ايام السنة صبح و ليل ، انها تكون جزء من الحياة ...

اما مهرجان واحد في السنة و تحضيرات عشان هالاكمن شاعر يحكولهم قصيدتين و شوية مسرحيات و بس

هاي بطلت ثقافة ، هاي صارت اشي بس مش ثقافة

و رح يكون الي مقال عنيف عن هالشغلات هاي ، بس خلوني اطلع من المستشفى اول
سلام

watan يقول...

alzaher

شكرا على مرورك وع التعزية وع التمنيات :)

watan يقول...

العبيط

الحمدلله ع سلامتك اولا ، وواضح انو كسور الرجل ما اثرت بالمخ والحمدلله

ثانيا : انا متفق معك انو الاصل بالثقافة تكون مع الناس دايما ، بس سؤال هل في وضعنا الحالي اشي زي مهو المفروض يكون؟
لأ ، طيب ما دام لأ لازم خطوة اولى ، يعني زي ما حكيت للي كانوا كرهانين المهرجان ومبلشين فيه ذم وقدح ووو
اذا في مهرجان بيساعدني اخلي اهل بلدي يقوموا ويحملوا مكنسة وينظفوا بلدي انا مستعدة اشتغل فيه
واذا في مهرجان بيخلي الناس تتذكر انو قريتي قرية جميلة جدا واثرية وتاريخها من تاريخ فلسطين انا مستعدة اشتغل لأخر نفس فيه
واذا في مهرجان بيساعد ع انتعاش الحالة الاقتصادية للناس فأنا مستعدة اشارك فيه
واذا في مهرجان بيخلي الشباب تتركلي ميلودي هتس وتقوم تتطوع فأنا برضو مستعدة اشتغل فيه
واذا في مهرجان بيرسم ولو بسمة صغيرة ع وجه الناس فأنا مستعدة اشارك فيه

فما بالك بمهرجان سبسطية الي جمع كل هالاشياء
في اله سلبيات كثيرة ، بتفق معك ورح اتطرق الها بعدين ،، بس بالنسبة النا وفي الوضع الحالي كان من الغباء جدا تطنيش كل هالايجابيات ونعمل فيها ابو العريف الحريص المثالي

اتوقع وصلت الصورة

ومع ذلك بستنى مقالك ، ما تفكر بنبسط بس اشوف حد بينتقد نقد بناء وبحب اقرأ للناس الي بيفكروا بطكريقة مكختلفة عني ( شرط يتوفر الكلمة الاولى وهي يفكروا !)

كون بخير

الحلونجي اسماعيل يقول...

سبسطية
ماهي؟؟؟
هي آثار محتل , وآثار حروب صليبية ..
فهل تستحق آثار ومخلفات محتل كل هذا الإحتفاء؟؟؟؟
هذا من جهة.
ومن جهة أخرى نضرب لكم المثال الآتي:
بما أن الحروب الصليبية والحكم الروماني كان في القرن ال12 للميلاد , يعني قبل 700 سنة تقريباً .
تخيلو بعد 700 سنة ,, (طبعاً فلسطين راح تكون تحررت , ما حد يحكي غير هيك) .
تخيلوا معي أحفادنا عمالهم بيحتفلوا وبينظفوا بالكينيست الإسرائيلي.!!!

أكيد حيكون شي رائع كثير .
::::
بعدين ألم يهدم أجدادنا الأوائل إيوان كسرى بعد فتح فارس ..
::
الموضوع بكل اختصار إنه السلطة الفلسطينية بتشجع السياحة بهالبلد التعبانة على ظهور الشباب اللي على نياتهم ,, وكمحصلة نهائية ( سيزداد الغني ثراءً وسيزداد المعدم فقراً ) ..يعني من الآخر غير أصحاب الأوتيلات الفخمة ’ والسينتواري حد داخل جيبته تعريفة ..
::
وعلى قولة الرفيق ماركس ( كن مستقل مادياً ستكون مستقل سياسياً ) ومن هنا أعلن استقلالي الذاتي ,, وفق الحدود التي تقرها وتعترف بها البلوجر .

المنفي يقول...

حمد الله ع السلامة يا حلونجي

ما بعرف شو هالعقلية الي بتخليك توصف قرية فلسطينية بهالشكل التحقيري والقدحي
الناس بالعالم المتحضر بيلفقو بالكذب لبلادهم تاريخ وانت شايف انو التاريخ في سبسطية عيب عليها
وانها مجرد مخلفات حملات صليبية واثار محتل
يعني برأيك بينسحب هالكلام على كل فلسطين التي تعج بالتاريخ والاثار
يعني لو كان سبسطية بيها اثار اسلامية كانت صارت منيحة،اما عشان بيها اثار رومانية فصارت شوية مخلفات رومانية صليبية واثار احتلال
طب شو رأيك لو كنا احتفلنا ببيت لحم،بتصير هي كمان مخلفات نصرانية وجب هدمها كما هدم ايوان كسرى
اعتقد انو الصحابة غلطو لما هدموا ايوان كسرى
يعني شو المشكلة لو ضل موجود لليوم كأثر تاريخي

ومن كلامك حسيت انو الشباب احتفلو بالرومان وبتاريخهم بطريقة وثنية مثل الهنود الحمر
اجتمعو حول عامود رخامي من الاثار الرومانية،ولعو نار،وحطوا ع راسهم ريش،وقعدو يلفو ويدورو حول العامود
الاحتفال والاحتفاء كان بالقرية، مش بأثار القرية الرومانية، لسبسيطة بكل بساطة،وهي قرية جميلة كأي قرية فلسطينية،ارض حلوة عليها ما يستحق الحياة،وتستحق ان نحتفي بيها،بما فيها من ارض وتاريخ واثار وجمال

وما في اي وجه مقارنة او علاقة بين الكنيست بعد 700 سنة وبالاثار الرومانية
مش هيك بتنقاس الامور،وليس هكذا تورد الابل يا حلونجي
لست هنا في درس تاريخ او حصة اثار ولكن هل الاثار الرومانية الموجودة في فلسطين من اثار الحملات الصليبية
ام من اثار الحكم الروماني
انت جمعت بينهم وهذا خطأ وقعت فيه
الحكم الروماني لفلسطين يعني قبل 2000 سنة
انت قلت قبل 700 سنة يعني الحملات الصليبية،وهاي على ما اعتقد ما تركت اثار عمرانية في فلسطين

بلاش اسلوب التهكم والتحطيم لاي شي ممكن يعملو الشباب لبلدهم،شباب في مقتبل حياتهم وبلاش كتير نفلسف الامور ونتحدث بلسان الخبير والمجرب والعارف ببواطن الامور من حقارات السياسة والسياحة والسلطة
الشباب عملو شي بارادتهم وبنيتهم عشان سبسطية
بس هيك وبكل بساطة
والي بدو يستغل هالشي لمصالح
مادية وسلطوية هو حر

انا اؤمن بالنقد جدا،بس اذا حبيت انقد هالمهرجان بنقدو من ناحية فنية،من ناحية اجرائية،عشان يكون افضل السنة الجاية،ويكتسب الشباب خبرة اكبر في طريقة تعبيرهم عن حبهم لهالبلد

وارحمونا بقا من لغة الخطاب الخشبية تبعت يسار السبعينات واسلام والالفينات

الحلونجي اسماعيل يقول...

والله وصاير تعرف تحكي ياولد .
هههه
ولك الكنيسة الموجودة في سبسطية من مخلفات شو؟؟!!
بعدين كيف أنا وصفت قرية سبسطية بشكل تحقيري؟؟!!
أنا وصفت الآثار الموجودة في القرية ,, وليس بإمكانك لا أنت ولا غيرك أن تصفها بغير ذلك ..( آثار محتل غاصب ) .
وبالنسبة لكنيسة المهد في بيت لحم , عنجد مش عارف شو هالمنطق العقيم بتحليل الأمور !! كنيسة المهد وسبب بنائها لا يضفي عليها سوى طابع قدسي بحت ..
وهي ليست كالمدرجات الرومانية التي بنيت على ظهور العبيد ,,
كم من إنسان قتل في المدرجات الرومانية أثناء بنائها ( يا إنسان)..
كم حفلة قتل جماعي وحشي تم في هذه المدرجات التي ترجع إلى العصور المظلمة من التاريخ ؟؟؟
بعدين كيف بتقارن ( مخلفات فاتحين ) (بمخلفات محتلين)إن جاز التعبير. حين نتكلم عن الفتوحات الإسلامية وتقارنها ببساطة بالإحتلال الروماني .
إذا ما بتفرق بين الفتوحات الإسلامية والإحتلال فهاي مشكلتك .
:::
الأهم إنو في مدون في غزة بيفهم أكثر من صحابة رسول الله !!! ومش عاجبه هدم أكبر صرح بشري عبدت فيه النار على مر عصور أيضاً لا توصف بغير الظلامية .
:::
أنا ما حكيت عن الشباب انهم احتفلوا بطريقة وثنية أبداً .. ولم اقترب من موضوع الاحتفال لا من قريب ولا من بعيد !!
::
المنفي يقول :"الاحتفال والاحتفاء كان بالقرية، مش بأثار القرية الرومانية، لسبسيطة بكل بساطة" !!
بالله جد
أمانة
وحياة ربنا بتحكي من عقلك !!
يا رجل إذا بيحتفلوا بسبسطية القرية وليس بآثارها فلماذا لا نحتفل بكل القرى الفلسطينية !!! ما تحكيلي لإنه عمر القرية طويل .. اللي كان عمره طويل احتلالها .. ولا شو تفسير عدد سكانها الضئيل جداً ..
والبوسترات الموجودة على تلفزيون فلسطين وعلى المدونات تظهر بما الاحتفال.
:::
وأنا عني مخلي تشريب الإبل لإلك انت .

:::
بعدبن من أنت حتى تحكم علي أني اتهكم على الشباب ( وأنت تتهكم علي في نفس الوقت)..
::
كمحصلة أخيرة لردك
انت اللي بتعرف في بواطن الأمور, وما بتتفلسف ,لإنك فيلسوف !!
المنفي . خخخخخخخ

المنفي يقول...

قبل اي شي بدي قلك يا حلونجي انو هادا اخر كلام ممكن اضيفو في هيك موضوع لانو احنا مش ببرنامج الاتجاه المعاكس وانا ما بحب الطوش الفلسطينية الجدلية

يبدو اني كلامي استفزك

ع العموم انا راجعت كلامي الي كتبتو وشفت انو فعلا هوالى حد ما مستفز ووجب عليا قول ذلك فانا راح التمس الك العذر
بس جرت العادة بما اننا اصدقاء بلوجرز انو الاختلاف لا يفسد للود قضية
واذا كنت استفزيتك بالقدح في فكرة انت طرحتها
فالاحرى بك انك ترد الاستفزاز بالمثل عن طريق فكرة مضادة
مش عن طريق كلام من نوع صاير تعرف تحكي يا ولد وخخخخخخخ وههههههه
ع العموم ما علينا وما راح انحدر لهيك طريقة

مثلك مثل اي فلسطيني قح دايما بيحكي بلغة القطع و اليقين
تقول
وليس بإمكانك لا أنت ولا غيرك أن تصفها بغير ذلك ..( آثار محتل غاصب ) .
انت من وين لوين بدك تغصب عليا وتفرض علي بالعافية وجهة نظرك

لا يا سيدي بامكاني وبامكان غيري يقول ما يريد..وجهة نظر
ووجهة نظري انو ايوة الرومان محتلين بس ما في عندي مشكلة مع اثارهم اذا ضلت موجودة بقريتي
لا بحتفل بهالاثار ولا بهدمها
ووجودها بقريتي ما بيعيبها قد ما بيميزها وبيثبت انو مرور الغزاة على هالارض طاريء ومتغير،والثابت هي الارض التي بتبقى
ما بيصير انو نحاكم التاريخ عن طريق الاثار؟
صحيح مات الالاف على هالمدرجات من عبيد بس هاي مشكلة الرومان مش مشكلة المدرجات
يعني نروح نلغمها وننسفها عشان مات عليها الاف العبيد من 2000 سنة
نروح نلغم الاهرام وابو الهول وننسفهم عشان مات الاف العبيد في بنائها
نروح نردم قناة السويس بالتراب والاسمنت عشان مات الاف في السخرة وحفر القناة

انا لما قلت انو الصحابة غلطو لما هدمو ايوان كسرى ما كفرت وما خرجت عن الملة

الإمام مالك بن أنس رحمه الله إمام دار الهجرة يقول: كل امرء يؤخذ من كلامه ويرد عليه إلا صاحب هذا المقام واشار الى قبر الرسول عليه الصلاة والسلام

وهاي يا عزيزي وجهة نظري
تحتمل الصواب وتحتمل الخطأ
بس لا تحتمل ادعائي اني افهم من الصحابة او التشبيه بين الفتح والغزو

يعني معاوية ابن سفيان رضي الله عنه وهو من الصحابة اختلف معه علماء عدول من علماء الاسلام في حربه مع سيدنا علي
وقالو عنه انه اجتهد واخطأ فله اجر
وسيدنا علي اجتهد واصاب فله اجران

والسلام عليكم

الحلونجي اسماعيل يقول...

أولاً أنت تعترف بأن كلامك مستفز ,, والتمست لي عذراً ..
فهل ستلتمس عذراً آخر في قولك في ردك الجديد (ع العموم ما علينا وما راح انحدر لهيك طريقة) .. !!!
::
شيء مؤسف حقاً
::


أيضاً تقول :(انت من وين لوين بدك تغصب عليا وتفرض علي بالعافية وجهة نظرك لا يا سيدي بامكاني وبامكان غيري يقول ما يريد..وجهة نظر
ووجهة نظري انو ايوة الرومان محتلين بس ما في عندي مشكلة مع اثارهم اذا ضلت موجودة بقريتي )
هذاما قاله المنفي.!!


.... الحقيقة أن المنفي يرفض أن أغصب عليه تقبل وجهة نظري التي لم ولن ولايحق لي أن أفرضها ,, أنا شاركت بوجهة نظري ومن حقي الطبيعي أتعصب لتفكيري,,
ولكن العيب هو أن تناقض ذاتك فأنت الذي تريد أن تغصب علي وجهة نظرك .. فأنا منذ البداية لم أوجه الكلام لأي شخص .. لا لك ولا لغيرك .. أنا قلت ما فكرت به .
:::::::::::::::

و أنا لم أقل بضرورة هدم هذه الحجارة ,, ولكن قلت أنها آثار محتل لا تستحق الاحتفاء ,,
ولا يجوز المقارنة بينها وبين أهرامات مصر أبداً ..
فالأهرامات المصرية لم تبنى من محتل , بل بنيت من أبناء البلد .

وترجع لمناقضة نفسك مرة أخرى حين تقول :( ووجهة نظري انو ايوة الرومان محتلين ) وأنا قلت :(وليس بإمكانك لا أنت ولا غيرك أن تصفها بغير ذلك ..( آثار محتل غاصب ) .
يعني رجعت أيدت ما قلت أنا !!
وبالنسبة للنبي الكريم عليه صلوات الله فلا ننسى أنه قام بنفسه كما فعل أبيه ابراهيم من قبله بتكسير كل الآثار الوثنية التي عبدها أجداده, ولم يبقي عليها لتزدهر مكة أو ديننا ببعض الآثار التافهة ,, فعظمة الإسلام ,الذي اقتبست من تاريخه الكثير , بالتمسك بالدين وليس بالإحتفاء ببعض الحجارة .
ومن هنا اجتهد أجدادنا وهدموا ايوان كسرى على غرار فعل النبي محمد .
:::
في النهاية النهائية

وخلي الاقتباسات الفتحاوية التافهة على جنب ( وارحمونا بقا من لغة الخطاب الخشبية تبعت يسار السبعينات واسلام والالفينات)...

أصلاً متى كان تعليقي يحمل لغة خطاب !!..
رجاءً حاول في المرات القادمة أن توظف كلماتك بشكل أفضل .
:::
واعتذاري لكل شخص قد أحس بالإهانة من تعليقي الأول بعد أن قام المنفي بتفسيره على غير ما كنت قصدت .حينما شبه الشباب هناك بالهنود الحمر !!
هي مجرد وجهة نظر , أو تفكير مقروء لا أكثر ولا أقل من إنسان بسيط يعيش في زقاق مظلم في واحدة من حارات مخيمات اللاجئين .
ورمضان سعيد على الجميع انشاء الله