الأربعاء، 30 يوليو 2008

حكي فاضي (1)


على أهبةِ اللاشيء ..

فنجانُ قهوةٍ يتسكرُ في داخلي العاجي كاحتراقك َ في دمي !!

فخرافتنا كانت منذ ُ البدءِ قصة ً، حكاية ً، اسطورة ً، زغرودةً شعبية ..

وبعض الملح ِ يَعِضُ على ما فاضَ من الوقتِ في انتظارِ ابتسامتك َ_ تلكَ التي تجمدت بلهبٍ بلا لهب في شوارع الريح المنزوي كقطةٍ منزلية!!_

ورحيلك ًالأزلي أكذوبةٌ رديئة ُالصنع ، احتسيها واتلعثمُ أشباهَ ابتساماتٍ باهتة .. سرعانَ ما تذوب في تساؤلكَ : ترى كم أنا في أنا ؟ وتصمتُ شاردا

فأضحكُ _ في سري طبعا_ على جهلكَ الابدي ،

وأقررُ _ في سري ايضا_ انه أحرى بك أن تسألَ :" كم لا أنت في أنت ؟" ما دامت كل غرفنا الخلفية _ يا صديقي_ مؤجرةٌ بأسعارٍ سياحية !!

ولأنَ صمتكَ شأنٌ داخليٌ تعلِكـُهُ وحدك كما تـَشاء ، ابتلعُ افكاري مرغمةً وألعن الزمن ساعة المساء!!

__

شكر ضروري: شكرا لبعض " شعرائنا وكتابنا" المعاصرين ، لولا الالهام العبقري في كتاباتكم لما استطعت كتابة " حكي فاضي"


ملاحظة ضرورية : كل علامات التعجب والنقاط لوازم شعرية أونثرية _ حسب ما يؤول أليه النص_ وضرورات للتنبيه على عبقرية ما انتجت قريحتنا

ودقي يا مزيكا ،،

هناك 13 تعليقًا:

لاجئ الى متى يقول...

وطن هنا .. يا مرحبا يا مرحبا
والله وطالت الغيبة
قبل كل شيء . الف الحمد لله على سلامتك يا وطنا
وبالنسبة للحكي الفاضي.. ( أنا ناقصني ياختي ) ** ـ
..
لا تتهربي واحكيلنا ـ شو . مين . لالالا والله . طيب ممتاز
شو في ؟
يلا احكي

..

اشعر بالقليل من التفاؤل بعودة الـ وطن
لعل وعسى
كوني دوما على أهبة أي شيء

watan يقول...

لاااجئ ،،

خيا والله ويا مية وتسعين مليون هلا

الله يسلمك ، تصدق وانا حاسة أني غبت كثير .. وبس هون رجعت من جديد .. اشتقتلكم واشتقت لحالي كمان :D

وهسا عندي نهم كبير لكل كلماتكم
_________

بالنسبة لحكي فاضي
نفسي اضحك لأنو كلكم اخذتوني ونصي المعفشك على محمل الجد .. شكلو الحق علي انا ما كنت واضحة
طيب هاد يا سيدي وبلا طول حكي زهقت وقرفت من " شعرائنا وكتابنا" - محششينا المعاصرين والي بيحطوا اللغة بمولينكس وبيسموا الي بيطلع قصائد ونثر
واحنا المفروض نفهمه ونحترمه لأنوا اذا ما فهمنا بنطلع جاهلين ومتخلفين!!

فاليوم حبيت اكتب هالنص لشغلتين : الاولى مشان ما يحملونا جميلة بكومة الخرابيش الي كاتبينها بما انو اي حدا حتى انا بقدر اكتب متلها ،
الثانية : انو كل صف حكي مهما كان حلو لو ما فيه معنى فهو بكل جدارة ... حكي فااااااااضي

ممكن النص اذا انشرحت فكرته بيخرب .. بس المرة هاي كان ضروري لأنوا شكلي زودتها بما انك خامس واحد بيسألني مين ، ليش، شو؟

وهاي البير وغطاها :)

__

اشعر بالكثير من التفاؤل لكوني بينكم

كن دوما على اهبة كل شيء

عبــــــــــث يقول...

وطن

يا 1000000000 هلا والله

منورة يا خالتي

وكيف جوزك والولاد

المهم ألف الحمد لله على السلامة

نحكي في الموضوع

كنت رح أحكي ها ! شو ؟؟؟ مين ؟؟؟

بس لما شفت التفسير فهمت والحمد لله

والله وصار الحكي الفاضي موضة هالايام

والشاطر اللي بيصير بيوم وليلة كاتب مشهور ....ودقي يا مزيكا على رأيك

تحياتي

عبث

عـــــــــــــــروبة يقول...

صــاحبتك،

ما بتعمل هيك أبداً ، مش مستعدة أنعت بصفة جديدة من قبل مثقفينا الأفاضل " جاهلة متلا" ..ومشان هيك بغوص معهم ، ليكتشفوا هما انه نصهم متعدد الأهداف والتحليلات وهما بعاد ، وبعدها بيقربوا بيختاروا الأفضل لهم ولمستقبلهم

:
" We mean that"

" فخورة بنفسي كوني أول الخمسة "

قرّأت والدي مرّة هذيك القصيدة اللي قرأناها احنا التلاتة في ذات صباح .

تفاجأت انه ملامح وجهه لم تتغيرْ بعد وقبل القصيدة..


وايش قصة المزيكا؟؟؟

لا يكون لزوم النط والدبك والرقص اللي احنا بصددهم.. بس بينفعوا بلا مزيكا..!!!ولا شو رأيك ؟

المنفي يقول...

سمك + لبن + عدس x الخلاط= حكي فاضي

watan يقول...

عبث ..

شكرا شكرا ، يعني لو حكيتي مضوية كان صدقت اما منورة؟!.. بعدين تعي لهون كم صفر بيطلعوا هدول :D

الله يسلمك و بما انا شفنا بعض واهلنا وسهلنا ببعض بعدين عن عالم التدوين ننتقل للموضوع

أول شي احكي شكرا لعمو لاجئ عشان خلاني اشرح السيرة واوفر ع حالي كومايات سوء تفاهم

بتعرفي هي صايرة موضة .. وممكن ينشهر بس شهرة كذابة بكرة بتروح ،، وما عنا مشكلة بالي بيصير كاتب مشهور بين يوم ليلة شرط انو يصير كاتب بالاول

ولا شو رأيك؟

سلمي

watan يقول...

عروبتي،

ههههههههههههههههههههههههههههههههههههههههههههههههههههههه مشان هيك مسميكِ أعقل مجنونة شفتها بحياتي ..

مني وعلي مستعدة ينادوني مجنونة وجاهلة والي بدهم اياه ... وانا شو دخلني ما دامني عم اعمل الاشي الي مقتنعة فيه ، جاهلة جاهلة ولا احكي ع حالي فاهمة حكي هو بالاساس فاضي

_
تصحيح
فخورة لكونك ثاني الخمسة
_
بالنسبة لوالدكِ
بعض الاشياء لا تعني لأحدهم ما تعنيه لأخر وقصائد قرأناها على الريق وبين سروات مدرستنا المكتظة بالعصافير ففرحنا حتى كدنا نطير متلهم قد تبدو لأخرين _ أهلنا مثلا_ كلمات عادية على الورق
_

المزيكا ..

مش احنا اتفقنا نمشي الطريق واحنا بنغني وندبك .. اعتبريها سلفة يختي ، ضروري تدققي
وحياة بلا موسيقى .. ممممم ما بعرف اذا بنقدر نسميها حياة << جوابا على سؤالك

تحياتي

watan يقول...

المنفي

نسيت التمر هندي

:D

غير معرف يقول...

لو كنت فعلا بتعرفي ما كنت سألت ما لا أنت في أنت?
احيانا بتختلط علينا الأمور ما بنعرف مين هم و مين احنا لكن في شيء اسمه المعرفة الخفية التي و لا شيء بأثر فيها إنما بتحتاج لشيء من البصيرة و التبصر و لشيء من الروية و التعمق قبل اصدار أسألة قاتلة!

watan يقول...

استاذ غير معرف

اسئلة قاتلة مرة وحدة

طيب مع انو كل الي كتبته كان حكي فاضي شرحت قصدي منه برد سابق

بس شكله انتج حكي مش فاضي متل تعليقك والي هو موضوع منفصل وطويل بده قعدة خاصة

شكرا على مرورك


:)

غير معرف يقول...

أكيد لازم يكون فيه قعده خاصة بس مع مين؟؟؟ مع أي واحد فيهم (:
طالما إنك مش عارفة كم لا هو في هو!
على كل نصيحة اجلسي مع نفسك واسألي نفسك الأسئلة التي توصلك للجواب اللي بريحك
شاعر إنه هذا اللي كم لا هو في هو..العيار الطايش صابه بكل مكان و هو مش رايق يراجع في مسائل أصبحت يقينية
لكن دايماً ما في حدا بعرف أكثر منا ! مش ادعاء معرفة بس سؤال كم لا أنت في أنت بولد سؤال أكبر أنا في أنا لأسأله كم لا هو في هو!!

غير معرف يقول...

تصحيح:
لكن دايماً ما في حدا بعرف أكثر منا ! مش ادعاء معرفة بس سؤال كم لا أنت في أنت بولد سؤال أكبر : كم أنا في أنا لأسأله كم لا هو في هو!!

watan يقول...

غير معرف


:)

وعم ابتسم لسبب بتعرفه انت لوحدك
كالعادة رح اسمع كلامك ورح يدور بعقلي كثير .. وكالعادة رح يدخلني بطريق جديدة ... رح احبها لاحقا

في اشياء ما بتتغير

تصحيح : في اشياء ما لازم تتغير

كون بخير صديقي
:)