الخميس، 25 سبتمبر 2008

نقاش ديمقراطي !


" يقولون أن علينا أن نغلق ملف القضية الفلسطينية، وان نحلها كما يريدون لنا أن نحلها، وأقول لهم أن كنتم تعبتم ففارقونا! " 
ناجي العلي
 " سيأتي زمن تصبح فيه الخيانة مجرد وجهة نظر!"
" أن كنا مدافعين فاشلين عن القضية فالأجدر بنا أن نغير المدافعين ، لا أن نغير القضية"
 غسان كنفاني
وبعد:-
_

- شوفي انا بالنسبة للحل النهائي للقضية الفلسطينية شايف الآتي : دولة مستقلة على حدود الـ67
وعاصمتها القدس الشرقية ...
- ...!

- .. بمعنى دولتين لشعبين ، هو أنا كنت أفضل دولة ثنائية القومية للشعبين ، بس الحل الواقعي بيقول دولتين لشعبين وسلام ونرتاح عاد.
- ...!!

- مالك ساكتة ؟؟ اللاجئين؟ ما تخافي الحل رح يتضمن عودة أعداد جيدة من اللاجئين إلى إسرائيل وتوطين الباقي في الضفة الغربية وفي غزة ، وتعويض من لا يرغب بالعودة
- ...!!!

- عرب إسرائيل ؟؟ يعني لأيش الحكي الفلسطينيين هم إلي بغزة وبالضفة بس ، لأ حتى بهالايام تقريبا بس إلي عنا بالضفة انتمائهم وهويتهم فلسطينية ، هدول عرب إسرائيل بكرة بس نحل القضية نهائيا ما رح ينحسبوا علينا رح ينحسبوا مواطنين إسرائيليين ، وبعدين حتى هويتهم وجواز سفرهم إسرائيلي .. صار انتمائهم يعني ... ولك ليش ساكتة وبتطلعي فيي هيك؟؟
- ...!!!!

- اسمعي هاد رأيي وأنا حر فيه ، يعني أحنا قاعدين بنتناقش وكل واحد ووجهة نظره وأنتي لازم تتعلمي تحترمي وجهات نظر الآخرين
- ...!!!!!

- لاااااأ هيك ما بصير ، بأي نقاش ديمقراطي لازم يكون في احترام لوجهات نظر الآخرين ، ما بصير التجريح والاتهامات هاي !
- ...!!!!!!!

- أنا مش خاين، تتطلعيش عليّ هيك ، مش مصدقة ؟ ها شوفي كم أغنية وطنية عندي بالجوال.
- ...!!!!!!!!

- أحكيلك أنتي وحدة رجعية وغير واقعية وما بتعرفي أشي اسمو منطق ولا حتى واصلتك الحضارة ...
وبتحلمي كثير و ... بينحكاش معك ، خلص، النقاش معك بيزنطي ، انا قايم !
- .../:)
ــــ
ملاحظة :
لهذه اللحظة لا اعرف اسما لهذه الحالة ولكنني في كل مرة اسمع أو أقرأ فيها كلمة " الحل النهائي للقضية الفلسطينية" يصيبني مغص شديد ورغبة عارمة بالتقيؤ على الموجود أمامي ، هو وديمقراطيته الواقعية التي تريدنا أن " نحل " قضيتنا كما " يحلون" العصير الرخيص في قنينة ماء!

هناك 17 تعليقًا:

كلمه يقول...

looool @ مش خاين، تتطلعيش عليّ هيك ، مش مصدقة ؟ ها شوفي كم أغنية وطنية عندي بالجوال.

لاجئ الى متى يقول...

التقيؤ ..
يعني انه الواحد يشعر بتشنج في المعدة
ويطلع كمية من الاكل والشراب
المختلط اصلا في المعدة عن طريق الفم
بطريقة رائعة الجمال
طبعا الخليط شبيه بالكوكتيل
الى درجة لا بأس بها
والشعور بالراحة بعد ذلك
وشرب كاسة شراب حل
ليمون
على ما اظن
اصفر يعني
لون يعن
لووووون ..

التقيؤ وييييييييييييييييين ؟؟!

ســــــلام

Beram ElMasry يقول...

سيدتى . سيدى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم

نورس من شاطيء غزه يقول...

طالما ان هناك نقاش ديمغرافي فغير واقعي ان يكون هناك نقاش ديمقراطي .

CًٍHًٍE يقول...

لَمْ أرَ شيئاً سوى علامة تعجب (!)



حزنت كثيراً عليكَ يا وطني ...




-
مذ خلقت وأنا لا افهم شيئاً عن القضية يقول هذا ويقول هذا نريد الوطن كاملاً ونريد ال48 ونريد ال67 ونريد الآن الضفة وغزة.... لم أعد أعرف حدوداً لوطن
-
من وجهة نظري لن يكون أي نقاشٍ معي ذا معنا لأنني مشوش ولي وجهة نظر غير مرتبطة مفصلياً بذات القضية
-
ومن المنطقي أن تشوش أفكاري حتى يقول لي أحدهم (الي ماخد إبر في السياسة) أنت لست وطنياً ولا تريد دولة وقد تصل ليقول لي أَنْتَ خَآئِنْ ...!
-
عندما استقللت بوجهة نظري ولن أسميها الحل الأمثل صرت قادراً على النقاش المبرمج نسبياً (فلنكن صريحين للحظات)

لكن عندما تناقشني ... أنا ...

تكون لي وجهة نظر مختلفة تماماً عما قد قلت لك ولكنها وجهة نظري التي أفخر بها فقط ...

-
ملاحظة: تكلمت عن نفسي ولا أعني نفسي.

//

che

عاشق من فلسطين يقول...

صديقتي وطن...

إدراجك هذا حرك الكثير في داخلي وأبدعتي عندما اخترت الصمت لغة للنقاش..

الصمت أبلغ.. كما دائما أفعل..
أي وطن يتحدثون عنه واية حلول نهائية.. هل أصبحنا مجرد أصفار مهمشة..

وطننا يعيش فينا رغما عن أنوفهم.. وليعلموا أننا هنا باقون وليشربوا ماء البحر..

دمتي بخير ..

العبيط يقول...

الحلو في الموضوع انو بسأل و بجاوب لحاله
" يعني أحنا قاعدين بنتناقش وكل واحد ووجهة نظره وأنتي لازم تتعلمي تحترمي وجهات نظر الآخرين - ....!!!!! - لاااااأ هيك ما بصير ، بأي نقاش ديمقراطي لازم يكون في احترام لوجهات نظر"

يعني بصراحة يا وطن الزلمة عندو اغاني وطنية بالجوال و حاطط وحدة فيهم رنة
يعني لازم تشوفي اصول الحوار الديمقراطي الاصلي تبع اغاني الجوال... و الاغاني الوطنية التشجيعية التهريجية اللي فش منها فايدة الا زيادة النوم بالجوال

و اصبح للديمقراطية حوار و اغاني كمان

watan يقول...

كلمه

لأ انت مش فاهم .. كلهن كم شريط وبنحرر القدس
وزغرتي يامو صلاح

watan يقول...

لاجئ الى متى

المشكلة بالموضوع ان تقيؤ العالم كله لن يجعلني اشعر بالارتياح
كون المشكلة الاساسية ليست عند " الانساني الواقعي الامور تبع الاغاني" هذا وانما هي عندي انا
انا التي لم افعل شيئا كي استحق ان اكون من المتقيئين بدلا من المتقيأ عليهم

فاهم علي؟

watan يقول...

beram elmasry

وانت بخير

watan يقول...

نورس من شاطئ غزة


فمن غير الواقعي كثير اشياء عم بتصير بواقعنا هسا
اقلها اهمية نقاشتنا على انواعها

watan يقول...

Che

بما انك صديقي من قال لي مرة في اطار الموضوع : " اولا ما اسمهمش شعب "
ارى انك تمتلك وجهة نظر محددة في هذا الموضوع ،

مشوش ؟ يمكن المعظم هيك بس تشويشك ما وصل لدرجة هالهبل الي بحاولوا" يحلولنا اياه" في الماء حتى ننام



هسا احنا خاينين بوجهة نظرهم ، لأنوا بدنا ارضنا كاملة .. طيب يا سيدي ع هالحال احنا ستين خاينين .. غيره؟


النقاش معك ... لن يكون باي حال من الاحوال بمثل هكذا نقاش
على الاقل سأستطيع فتح فمي لغير التعجب!

كن بخير صديقي الذي تاه عن نفسه

watan يقول...

عاشق من فلسطين


هو للامانة انا ما اخترت اشي، انت لما تكون قبال واحد من هيك نوعية غصبن عنك رح تظل ساكت لأنوا ان فتحت تمك ما بتضمن يكون هالفتح بهدف العض مثلا!

ومن جهة اصفار مهمشة، معهم حق، اصفار ونص .. واحنا الي اخترنا هالمنزلة لحالنا ما دام قاعدين رجل ع رجل وبس شاطرين نحكي ونسب عليهم .. بس نصير نقوم ونتحرك بنبطل اصفار وبيبطل تفكيرهم عنا يفرق معنا


بحر ايش وباقون وين؟
في اللجوء ، في المخيمات ورا الحدود؟

والله يا رفيقي مو شايفة غير رح يشرب مية البحر ( اذا سمحلونا طبعا) ما دامنا هيك

watan يقول...

العبيط


اه اوتوماتيكي الزلمة ، بيشتغل لحاله
، مو بحكيلك هالجماعة متطورين

وبعدين انت مش عارف النسخة الجديدة :

وللحرية الحمراء باب
بكل طبل رقاصة يدق


وبـ الكاسيت وبـ السي دي نفديك يا فلسطين

لأ حررناها ع البكير

متشرّد يقول...

..... !

نسيـــــــان يقول...

ليش في اشي اسمو ديمقراطيه لحتى يكون في نقاش ديمقراطي ؟؟
طيب ليش لما بدنا انلاقي حل لقضيتنا منرجع لل 48 و لل67 و هون اوسلو و هون واشنطن وهون القاهره و هناك مكه
طيب انا عندي اقتراح خلينا انجدد البيعه .
يعني بلاش لما نيجي نحكي بالقضيه تعرضولنا كل هلابداعات الي ابدعناها بالماضي .
وطن سيبك من هلحكي .روحي كولي كعك العيد
كل عام و انتي بخير

رهام Reham يقول...

رائعة وطن..
لم اقرأ تدوينة بهذه الروعة منذ زمن..